REVISTA  EDICIONS  ESPANDIS  IMAGES  PARTENARIS  LIGAMS  CONTACTES  
OC : « APARTENÈM AU MONDE » 

 

ADRALHADA

 

La revista OC espeliguèt a Tolosa en 1923, amodada per Ismaël Girard. Dempuèi a pas jamai arrestat de paréisser. Tota son adralhada fai rampèl al quite messatge de son fondator : « Apartenèm au monde ». En occitan mai que mai, ambe d’òbras en catalan e tanben de tèxtes revirats d’autras lengas, balha, a bèl talh d’annadas, una vista larga de la creacion literària contemporanèa, plan en-delai de l’univèrs lingüistic sieu. De Niça a Bordèu, de Lemòtges e Clarmont a la Val d’Aran, en passant per las Valadas Occitanas d’Itàlia, OC retrai çò prumièr la poténcia creadoira de tot l’espaci occitan dins lo concèrt de las literaturas del monde. Dubèrta a la literatura catalana, la revista es, dins las doás lengas siás, l’occitan e lo catalan, un lòc privilegiat d’experimentacion innovaira per d’autors qu’an causit de persègre l’aventura aviada en Euròpa pels Trobadors. Es din OC que foguèron publicats los tèxtes màgers dels grands escriveires occitans contemporanèus.

 

 

ORIENTACION

 

Amb una direccion allocada de’n prumièr a Tolosa, puèi a Bordèu, Montpelhièr, Niça, Moans-Sartós, dins las Alps Marinas, e ara a rasis de Vilanuèva-d’Òut, OC capèla tot l’espaci occitan e catalan pr’amor del repartiment pro larg dels autors e dels redactors. Pròsa, poësia, critica literària, anóncia de çò que ven d’espelir e cronica dels eveniments culturals compausan d’acostumada lo somari d’OC. La novèla equipa de la revista voldriá far plaça tornar a las òbras de plasticians, pintres e fotografes per tant d’acompanhar los tèxtes publicats... D’ont que vengan, mès que vengan !

 

 

TALHS DUBERTS

 

Per tal de s’acarar a las escomesas de son epòca, OC a ajut mantun còp publicat de numeròs especials e portat pèira a de debats virats cap a las problematicas pus agudas, coma las de l’escritura e del poder o dels enjòcs de creacion dins de lengas autras que las « grandas lengas ». A totjorn balhat la paraula a las generacions que contunhan lo prètzfait. Es atal que paresquèron los prumièrs recuèlhs d’una colleccion bilingüa (occitan o catalan-francés), OC / Passatges, per far ausir aquelas voses novèlas plan pauc presentas dinc’ara dins lo païsatge literari. Enfin, en mai de participar a las principalas manifestacions culturalas dins l’airal occitan e plan en-delai, OC volonta d’amodar de son bòrd d’eveniments que siasquen a cada còp d’oportunitats màgers al servici d’una creacion dubèrta.

 

Plan del siti | © revista OC | AVATAM Studio